آخر الأخبار

بالصور الفنان محمود إمام علي السجادة الحمراء بمهرجان القاهرة السينمائي 41

img
سلايدر فنون

ظهر الفنان محمود إمام بأحدث إطلالة له على السجادة الحمراء في ختام مهرجان القاهرة السينمائي الدولي في دورته الـ 41.

ونشر محمود إمام عبر صفحته الشخصية علي موقع التواصل الاجتماعي “فيس بوك” منشور قال فيه “ختام مهرجان القاهرة السينمائي الدولي مع الناس الحلوه الي بحبهم ”

وداعي محمود إمام جمهوره بمنشور اخر من علي السجادة الحمراء بمهرجان القاهرة السينمائي الدولي في دورته الـ 41 “تقريبا انا احسن ممثل في #مهرجان_القاهرة_السينمائي الدولي ؟؟ادعولي ”

اخر حوار صحفي للفنان

– تجربة المسرح من أحلى الفترات الفنية في حياتي

– “نصيبي وقسمتك” أحسن فرصة درامية مريت بها

– الإعلانات بتشبع رغباتي الفنية

حبه للمسرح والفن منذ طفولته جعلا منه فنان ساطع ومتميز واستطاع أن يتألق في العديد من الأدوار التليفزيونية يذكر منها مسلسل “هوجان، نصيبي وقسمتك، ممنوع الاقتراب أو التصوير وغيرها من الأعمال التليفزيونية الأخرى.

“الفجر الفني” التقى بالفنان الشاب محمود إمام للحديث عن بداياته الفنية وأحدث أعماله القادمة، وإلى نص الحوار،،

* في البداية، حديثنا عن بدايتك في مجال التمثيل؟

بدايتي في مجال التمثيل كانت عن طريق مسرح الجامعة، ومن بعدها بدأت أفهم في المجال شوية لما دخلت قصور ثقافة ومسرح دولة ومنها الإعلانات، مسلسلات، أفلام الحمدلله.

* كيف قمت باكتشاف موهبتك الفنية؟

اكتشفت موهبتي بمسرح الجامعة، واللحظة الحقيقية بقا اللي دي متكلمتش عنها، لما اتاكدت من الموهبة الحمدلله لما أستاذ سامي مغاوري أخذني لأستاذ حسن عبد السلام الله يرحمه، مخرج مسرحي كبير في مسرح السلام، وساعتها أستاذ حسن عشان مخرج كبير وقدير قالي لا اطلع على المسرح مش اللي هو بقا عشان حد جايبني خد دور على طول، اطلع على المسرح واعمل كذا كذا، كانت عندي رغبة كبيرة، مسرح السلام كبير وكنت لسة قبلها كان مسرح جامعة بنسبالي حاجة قوية، فالحمدلله يعني ايه اديت وبعدين اختارني، قالي انت موهوب وهتكون معايا، ووعدني ببطولة لو عمل مسرحية تانية بس هو توفى.

* حدثنا عن تجربتك بالمسرح؟

تجربة المسرح بنسبالي أحلى فترة فنية، وأتمنى أرجع للمسرح تاني بعرض قوي، لان رقصت وغنيت ولعبت مايم وساعدت إخراج وأخرجت ومثلت طبعاً كل ده على المسرح، لعبت عرايس.

* من وجهة نظرك، هل المسرح في حالة ركود حاليًا عن المسرح قديما؟

حالياً بالنسبالي المسرح اه طلع تاني تتطور بعد ما كان نايم جداً الفترة اللي فاتت، ابتدى فيه اهتمام بعد ما المسرح القومي رجع وكايرو شو بقا في عروض كتير بتتعمل حلوة وقوية، فيارب دايماً، بيتعمل دلوقتي مثلا اللي هو “الملك لير”، داخلين علاء الدين فالحمدلله.

* ما العمل الفني الذي أحدث طفرة في حياة محمود إمام؟

بالنسبالي العمل اللي أحدث طفرة “نصيبي وقسمتك” دور وليد لأنه كان أحسن فرصة درامية ليا، وكاتب مهتم جداً بالتفاصيل زي الأستاذ عمرو محمود ياسين ومخرج شاطر جداً الأستاذ مصطفى فكري، وبعدين اتشاف جماهيريا درجة عالية جداً، وحسيت ده لما مرة كنت ماشي في إسكندرية كمان ولقيت شباب بيوقفوني على القهوة ولقيتهم بيسمعوا الدور بتاعي وغير ان ليا لقاءات مهمة بقا منه بعد كدة كذا حد.

* ما من أعمالك الفنية الأقرب لقلبك؟

“نصيبي وقسمتك” و”ستات قادرة” في دور كريم عشان شايفه كويس جداً، وعشان أكبر مساحة عملتها يعني.

* ما معايير الفنان الناجح في رأيك؟

الفنان الناجح في رأيي اللي دايماً بيدرس، بيعلي من ثقافته، بيحاول يعمل الأفضل والأحسن، ولازم يكون في هدف من العمل الفني ده عشان يأثر في الناس بإيجابيات مش سلبيات، ب اذن الله يعني أكون منهم.

* هل للسوشيال ميديا دور في نجاح الفنان أم لا؟

للأسف السوشيال ميديا بقت كل حاجة دلوقتي، يعني حتى في أعمال أصلاً مبتنجحش في الحقيقة بتنجح على السوشيال ميديا، كمسلسلات بقا مثلاً ممكن مبتنجحش غير لما يتعملها دعاية على السوشيال ميديا، كأفلام سينمائية، كطبعاً الناس اللي بتعمل أي هري وبقت تنجح في السوشيال ميديا، أتمنى بعد كدة النجاح الحقيقي يكون للفن الحقيقي مش لأي حاجة على السوشيال ميديا وخلاص.

* ماذا عن تجربتك بمجال الإعلانات؟

بحبها جدا، لان الإعلان بيشبع رغباتي الفنية شوية يعني مثلاً إعلان حملة وزارة المالية اللي انا كنت عامله في رمضان اللي فات الإعلان بتاع طاهر، الحمدلله يعني اتذاع على كل القنوات، كنت بشوفوا كل يوم وانا بشوف أي مسلسل فبفرح، ده اللي انا نفسي فيه ان انا ببقا شايف نفسي في رمضان ال30يوم، فده محصلش لسة في الدراما حصل معايا في الإعلانات عشان كدة بحبها جداً .

* حدثنا عن العمل مع المخرج مصطفى فكري في مسلسل “نصيبي وقسمتك”؟

العمل مع الأستاذ مصطفى فكري كان أستاذ بجد يهتم بالتفاصيل جداً، المخرج الفرفوش رزق زي ما هما بيقولولوا دلوقتي دايماً، مخرج فرفوش فعلاً بيعرف ازاي يطلع طاقة حلوة من الممثل اللي قدامه وطبعاً بحييه بقا على نجاح الجزء الثاني والثالث، وبتمنى ان انا اشتغل معاه تاني.

* كيف استعديت لدور سميح بمسلسل “هوجان”، وماذا عن تجربتك بالعمل مع الفنان محمد إمام؟

انا ذاكرته كدة على السريع عشان كان الوقت انا عملته على الهوا زي ما بيقولوا واحنا في رمضان صورتوا، فهو كان في نقلة حلوة ان هو بيحاول يكدب في الاول ويلاوع، بس هو مش قادر يكدب فيبتدي يقول الصراحة بس هو خايف، فعجبني الدور جداً، والحمدلله كان محوري في المسلسل فمبسوط جداً ان انا شاركت في هوجان مسلسل ناجح ، الفنان محمد إمام يعني انا طول عمري بتمنى اشتغل مع الاستاذ عادل إمام، اشتغلت مع محمد إمام يبقا مش مشكلة يعني الزعيم بردو ابن الزعيم، هو فنان جميل جداً واجتهد قوي في مسلسل هوجان عشان كدة المسلسل نجح.

* في نهاية حديثنا من هو مثلك الأعلى في مجال التمثيل؟

الأستاذ العبقري طبعاً أحمد زكي الله يرحمه، اللي مجاش ولا جه زيه في مصر، اتمني اعمل كمية الأدوار والسينما بالعمق اللي هو عمله.

مواضيع متعلقة

اترك رداً